SANTRI SABA LEMBUR MEDIA

KEUR NGALATIH SANTRI

Ustadz H. Dedi Setiadi, BA

(Mudir Mu’allimien Al-Fithri Cimaung)

Pesantren Persatuan Islam No. 228 Al-Fithri Cimaung Kabupaten Bandung, Mu’allimien jeung Tsanawiyah Al-Fithri ngayakeun program unggulan di tiap semester dua dina tiap taun. Nyaeta Program Santri Saba Lembur. Program anu wujudna nyaeta ngeusian Pangaosan rotin nu biasa diayakeun di masjid-masjid nu aya di wewengkon Kecamatan Cimaung, Pangalengan, Banjaran jeung Cangkuang. Kagiatan Santri Saba Lembur bakal dipitembian di Madrasah Nurul Iman Kp. Cibeurang Desa Mekarsari Kec. Cimaung, dina Juma’ah kaopat, dilaksanakeunana ba’da Jum’ah. Dina ieu kagiatan aya tim khusus nu jerona santri jeung asatidz nu mibanda pancen masing-masing.  Tilu santri Mu’allimien kapancen jadi MC (pangatur waktu), nu Tilawah Al-Qur’an, jeung nu nepikeun Kulkas alias Kuliah Ringkas atawa Kuliah Tujuh Menit tea.

Ieu program dijalankeun teu leupas tina nu jadi udagan nyaeta keur ngawanohkeun kagiatan Pasantren Al-Fithri ka masarakat jeung pikeun ngalatih sangtri sangkan wanter biantara di hareupeun masarakat. Ku ieu kagiatan teh para santri nu lulus ti ieu Pasantren teh geus siap pake. Masagi ku elmu pangaweruh, luhung ku elmu, sugih ku pangarti, jembar ku panalar. Siap jadi lulugu dina sagala widang di masarakat, khususna bagbagan ka-Islaman. Nu dipalar aya mangpaat keur mang kahareupna. Di masarakat moal putusna kader nu ngurus masjid, madrasah, jeung pangajian.

Salian ti Program Santri Saba Lembur, aya deui Program Bina Umat. Ieu mah dilaksanakeun saminggu sakali. Anu geus berjalan teh nyaeta kajian Tafsir sareng Hadits di Masjid Nurul Iman Kp. Cibeurang Desa Mekarsari. Nu geus maneh jadi narasumberna nyaeta ustadz H.Dedi Setiadi sareng ustadz Iwan Ridwan, S.Ud.Dina kajian ieu, masarakat dibere kabebasan keur nanyakeun sagala rupa permasalahan nu patali jeung kahirupan sapopoe. Sabab, masih keneh hal-hal nu teu aya dasar tina Al-Qur’an jeung Sunnah anu dilakukeun ku masarakat.