Ku Rahmat Taufik Hidayat
Simkuring boga
budak nu kahiji, ayeuna teh keur sakola di TK A. Kadang-kadang simkuring sok
ngahuleng ngaraga meneng, mikiran mangsa ka hareup keur budak. Mangsa nalika
geus tamat ti TK tea. Ari cita-cita mah hayang nyakolakeun budak teh ngarah
seteril tina pangaruh goreng pergaulan di masyarakat. Budak teh hayang
diasupkeun ka sakola anu nerapkeun sistem boarding school atawa full day
school.
Ngan
kuring rada ragu, naha kuring mampu nyakolakeun budak ka sakola berkualitas
atawa unggulan? Sabab, ngukur kana kamampuhan diri dina bagbagan ekonomi nu
batan sakieu. Ari biaya sakola atawa daftar jeung bulanan di sakola unggulan
teh sakitu mahalna. Rek asup ka SD boarding school teh biaya awalna 10 juta,
mun ka full day schoolna 8 juta.
Kuringa
rumahuh, mun ekonomi teu aya peningkatan, geus pasti we moal bisa nyakolakeun
budak ka boarding school atawa full day school teh. Kuring nu boga budak karek
hiji ge geus bingung, komo nu geus boga budak sababara hiji. Nu rek ka TK
unggulan, SD unggulan, SMP unggulan, jeung ka SMA unggulan. Memang
sakola-sakola unggulan teh bisa ngaran lembagana mah pasantren. Ngan nyakitu
dina biayana, moal kabedag ku jalma leutik. Malah asupna ge pan kudu ngaliwatan
seleksi.
Memang
kuring ngamafhum, yen keur ngadidik budak sangkan pinter jeung soleh teh perlu
biaya. Biaya anu teu saeutik. Tapi, atuh moal aya pemerataan meureun dina usaha
mencerdaskan bangsa jeung umat teh. Ngan jalma-jalma ti kalangan umat Islam anu
boga kamampuhan wungkul nu bisa sakola di sakola Islam anu unggul teh. Anu
sawarehna, anu kalolobaanana geus pasti asup ka sakola-sakola biasa. Malah
sawarehna mah pasti milih teu sakola jeung teu nuluykeun sakola, da teu boga
biaya.
Kuring
rada bingung, sanajan budak kuring sataun deui di TK-na teh. Sabab, sieun
kuring teu bisa nyakolakeun budak di sakola Islam unggulan. Komo bari kuring
boga cita-cita budak teh hayang jadi hafizh Qur’an. Sangkan teu siga kuring,
nepika ayeuna can jadi hafizh Qur’an. Kakarek apal sababaraha juz jeung
ayat-ayat pilihan we. Memang diajar budak teh bisa di imah, diajar ku indungna
atawa ku bapana. Ngan pan realitana gening jarang nu mulus mun diajar ku
kolotna mah, sanajan bapana atawa indungna guru oge. Jadi nu leuwih hade mah
diajar budak teh ku batur. Lain hartina ku kolotna diculkeun, ngan dina hal-hal
anu memang kolotna teu mibanda kompetensi kaelmuan wungkul.
Ku
ningali kondisi sarupa kitu, ahirna muncul kahayang jeung cita-cita. Dina
mangsa nu bakal datang, mun diparengkeun jadi jalma nu jembar rezeki. Rek
ngawangun sakola Islam nu berkualitas bari murah alias kahontal ku sakabeh
kalangan masarakat. Rek nu beunghar rek nu miskin, kabehanana bisa sakola di
ieu sakola. Sabab, dina pendidikan ulah aya diskriminasi. Ulah aya jurang
pamisah anu lega antara si miskin jeung si kaya.
Insya
Allah di eta sakola biaya keur nu teu mampuh 100% gratis, kajaba nu mampuh kudu
mayar ngan diluyukeun jeung kamampuhanana. Istilahna mah subsidi silang tea. Nu
mampuh mantuan teu mampuh atawa nu kurang mampuh. Bagja kacida mun ieu
cita-cita bisa ngawujud. Jalma nu siga kuring moal bingung nu teu manggih
tungtung moal susah nu taya sudana. Tinggal daftar, tinggal asup, tinggal
diajar nu soson-soson. Kaluar ti pasantren jadi ulama.
Peuperiheun
dina widang ekonomi atuh, Jawa Barat Jawa Timur, nu malarat-malarat nu
ma’mur-ma’mur. Cing atuh dina widang pendidikan mah kudu rata, karasa ku
sarerea. Sabab, hirup di dunya teh lain jalma nu beunghar wungkul, tapi aya
jalma miskin.
Oge
ieu kaayaan teh kudu jadi panggeuing pikeun jalma-jalma nau beunghar sangkan
peduli ka dhuafa. Mibanda kepedulian sosial ka kelompok anu miskin. Ku cara
mere bantuan biaya pendidikan nu disebut bea siswa atawa bea santri. Hiji jalma
beunghar bisa nyakolakeun sababaraha budak ti jalma-jalma anu miskin. Sahingga,
jalma beunghar meunang kahdean anu pangpikul-pikul. Kahadean tina nyakolakeun
budakna sorangan, jeung kahadean tina nyakolakeun budak batur.
Sakola
murah berkualitas bisa ngawujud, mun seug jalma-jalma beunghar siap berbagi.
Siap nulungan jalma-jalma anu teu mampuh nyakolakeun budak, bari hayang boga
budak anu pinter tur soleh. Boga budak anu waladun shalihun.
