Hamdan wa syukron lillah. Asyhadu anla ilaaha illallah wahdahu
laa syarikalah. Wa asyhadu anna Muhammadan ‘abduhu wa rosuluh. Amma ba’du.
Jalma anu hade nyaeta jalma anu resep migawe amal hade. Manehna
mah karesep jeung hobina teh ngan saukur milampah mangpirang-pirang kahadean.
Teu resep migawe hal-hal anu goreng boh nu goreng ceuk manusa pon kitu deui
numutkeun agama.
Dimana bae manehna aya, jeung iraha bae manehna estuning
ngamangfaatkeun umur jeung waktuna ku migawe rupa-rupa kahadean. Bari
didadasaran ku niat ikhlas ngan saukur miharep rido Pangeran. Rek beurang rek
peuting, rek keur sorangan atawa keur loba batur manehna istikomah dina amal
hade.
Manehna miggawe amal saleh lain kulantaran manehna keur kampanye
rek nyalon jadi dewan. Lain oge pedah manehna hanya katangar jeung hayang
kapuji ku papada jalma. Lain. Estuning clik putih- clak herang datangna tina
ati sanubari anu bersih herang ngagenyas. Bodas nyacas.
Sabab, teu saeutik jalma resep migawe amal saleh. Loba amal
baktina ka masarakat lain niat ikhlas lillahi Ta’ala. Tapi kusabab hayang
kapilih dina pemilu. Manehna hayang dipilih ku rahayat sangkan jadi panguasa.
Sangkan bisa ngaraih sagala udagan hirupna jadi pejabat, imahna bertingkat
empat, mobilna mengkilat, istrina oge opat. Ngan hariwang sieun meunang
ngabangsat.
Tah hayu urang usaha satekah polah sangkan jadi jalma anu resep
jeung hobi migawe kahadean. Jeung poma ulah resep jeung hobi migawe kagorengan.
Sabab, kagorengan mah matak cilaka lain matak bagja. Sangsara di dunya cilaka
di aherat. Beunghar didunya henteu di aherat dikulub dina naraka
Jahanam,na’udzu billahi min dzalik.
Mending keneh jadi jalma anu hobi milampah kahadean, jaga di
aherat bakal rebo ku pahala lain ku dosa.
Nu ahirna hirup tonemu bagja, bahagia salamina hirup dipapaes ku
kagumbiraan genah ngahenang-ngahening genah nyandang- genah nyanding. Abadi di
surga. Eta buah tina amal hade nu dilakukeunana salila keur hirup di alam
dunya.
